കോട്ടയം മെഡിക്കല്‍ കോളജ് ബസ് സ്റ്റാന്‍ഡില്‍ വാക്കേറ്റവും അസഭ്യവര്‍ഷവുമായി ഏറ്റുമുട്ടി സ്‌കൂള്‍ വിദ്യാര്‍ഥിനികള്‍.
തിങ്കളാഴ്ച വൈകിട്ട് 4.30 ഓടെയാണ് സംഭവം. ആര്‍പ്പൂക്കര ഹയര്‍ സെക്കന്‍ഡറി സ്‌കൂളിലെ രണ്ട് വിദ്യാര്‍ഥിനികള്‍ തമ്മിലായിരുന്നു സംഘര്‍ഷം.
സ്‌കൂളില്‍ നടന്ന പരിപാടിയില്‍ കമന്റടിച്ചതോടെയാണ് സംഭവം തുടങ്ങുന്നത്.
തുടര്‍ന്ന് ബസ് കയറുന്നതിനായി സ്റ്റാന്‍ഡിലേക്ക് പോകുമ്പോള്‍ ഇരുവുരം തമ്മില്‍ റോഡില്‍വെച്ചും വാക്കേറ്റമുണ്ടായി.
ഇതോടെ സുഹൃത്തുക്കളായ മറ്റ് വിദ്യാര്‍ഥിനികളും കൂടി. തുടര്‍ന്ന് നാട്ടുകാരും സംഭവത്തില്‍ ഇടപെട്ടെങ്കിലും സ്റ്റാന്‍ഡിലെത്തിയ ഇവര്‍ വീണ്ടും അസഭ്യം പറയുന്നത് തുടരുകയായിരുന്നു.
വിവരമറിഞ്ഞ് സ്ഥലത്തെത്തിയ ഗാന്ധിനഗര്‍ പോലീസ് നാല് വിദ്യാര്‍ഥികളെ കസ്റ്റഡിയിലെടുത്ത് സ്‌റ്റേഷനിലേക്കു കൊണ്ടുപോയി. തുടര്‍ന്ന് രക്ഷിതാക്കളെ വിളിച്ചുവരുത്തി വിട്ടയയ്ക്കുകയായിരുന്നു.
